Böyük Britaniyada təhsildən sonra iş axtarmaq üçün verilən Graduate vizası qısalır. 1 yanvar 2027-ci ildən verilən müraciətlərdə bakalavr və magistr məzunları iki il yox, 18 ay alacaq. Doktorantura məzunları üçün müddət əvvəlki kimi üç ildir.
31 dekabr 2026-dək
- Bakalavr və magistr
- 2 il
- Doktorantura (PhD)
- 3 il
1 yanvar 2027-dən
- Bakalavr və magistr
- 18 ay
- Doktorantura (PhD)
- 3 il
Kimə təsir edir
Həlledici olan təhsilə başlama tarixi yox, Graduate vizasına müraciət tarixidir. 2026 payızında başlayan hər kəs bu dəyişikliyin altına düşür: bir illik magistratura 2027-ci ilin payızında, üç illik bakalavr 2029-da bitir və hər ikisinin müraciəti 2027-dən sonraya qalır.
- Bu il magistraturanı bitirənlər: universitet təhsilin bitdiyini Daxili İşlər Nazirliyinə bildirəndən sonra müraciət etmək olar. Bu, 31 dekabr 2026-dək olsa, iki il verilir.
- Graduate vizasına müraciət Böyük Britaniyanın içindən, tələbə vizası hələ qüvvədə olanda edilir. Viza bitəndən sonra bu yol bağlanır.
- Graduate vizası müddətində istənilən işdə işləmək, iş axtarmaq və ya öz işini qurmaq olar; bu vizanın müddəti uzadılmır. Graduate vizasında sponsor və ya minimum maaş tələbi yoxdur. Sonra Skilled Worker vizasına keçmək üçün isə işəgötürən sponsor olmalıdır.
Tələbə vizası neçəyə başa gəlir
- Viza rüsumu
- 558 £
- ≈1 270 ₼
- Tibbi haqq (IHS)
- ildə 776 £
- ≈1 770 ₼ ildə; bütün təhsil müddəti üçün birdən ödənilir.
- Yaşayış pulu, Londondan kənarda
- ayda 1 171 £
- 9 ay üçün 10 539 £ göstərilir.
- Yaşayış pulu, Londonda
- ayda 1 529 £
- 9 ay üçün 13 761 £ göstərilir.
- Graduate vizası
- 937 £
- ≈2 140 ₼; üstəlik bu vizanın müddəti üçün IHS.
Yaşayış pulu ən çoxu 9 ay üçün hesablanır və müraciətdən əvvəl ən azı 28 gün ardıcıl hesabda qalmalıdır. Birinci ilin təhsil haqqının ödənilməmiş hissəsi də bu məbləğə əlavə olunur. Bank arayışının tarixi 31 gündən köhnə olmamalıdır.
İngilis dili
Bakalavr və magistratura üçün universitet dil səviyyəsini özü qiymətləndirə bilər, adi IELTS Academic qəbul olunur. Foundation ili kimi dərəcədən aşağı proqramlar üçün isə yalnız UKVI siyahısındakı imtahan keçir. Bakıda IELTS Academic 575 ₼, IELTS for UKVI 625 ₼-dır, ikisi də British Council mərkəzində verilir.
2026 payız qəbulunda Böyük Britaniyaya 15 tələbəmiz getdi. Onlardan altısı magistraturaya bir illik proqramla gedib və Graduate vizasına 2027-ci ilin payızında, artıq 18 aylıq qayda ilə müraciət edəcək.
