Ümumi qan analizi nəyi göstərir

Eritrositlər oksigen daşıyır, hemoqlobin isə onların içində oksigeni tutan zülaldır. Hesabatımızda hemoqlobinin intervalı qadınlarda 120–155, kişilərdə 130–170 q/L-⁠dir. Aşağı hemoqlobin qanazlıq deməkdir, səbəbini isə başqa göstəricilər göstərir.

MCV eritrositin ölçüsüdür. Kiçik eritrositlər çox vaxt dəmir çatışmazlığında olur və onda həkim ferritin yazır. Azərbaycanda kiçik eritrositlərin başqa səbəbi irsi talassemiya daşıyıcılığıdır: ferritin normaldırsa, həkim bunu yoxlayır. Böyük eritrositlər B12 vitamini və ya fol turşusu az olanda görünür.

Leykositlər infeksiyaya qarşı işləyir. Formulda onların beş növü ayrıca sayılır: neytrofillər, limfositlər, monositlər, eozinofillər və bazofillər. Neytrofillər çox vaxt bakterial infeksiyada, limfositlər virus infeksiyasında, eozinofillər allergiyada və qurd invaziyasında artır.

Ağır idmandan, stressdən və siqaretdən sonra leykositlər bir az artır. Ona görə analizdən bir gün əvvəl ağır məşq etməyin və qan verməzdən əvvəl 10–15 dəqiqə oturun.

Trombositlər qanaxmanı dayandırır; interval 150–400 ×10⁹/L-⁠dir. Sayları azdırsa və ya qançırlar tez əmələ gəlirsə, həkim adətən koaquloqramma yazır.

Hər göstəricinin yanında yaşınıza və cinsinizə görə interval var. İnterval sağlam insanların 95%-⁠ni əhatə edir: sağlam adamda 26 göstəricidən biri-ikisi sərhəddən bir az kənar çıxa bilər. Nəticəni bütün göstəricilərlə birlikdə həkiminiz oxuyur.

Ümumi qan analizi 12 ₼ edir. Ac qalmaq lazım deyil, yüngül səhər yeməyindən 4 saat keçsin. Nümunə 12:00-⁠dək verilibsə, nəticə həmin gün 18:00-⁠da hazırdır. EÇS ayrıca analizdir, qanı eyni gəlişdə götürürük.