· Filiallar və terminal · 2 dəqiqəlik oxu
Terminalda iki yeni yükləmə qapısı açıldı
Qapıların sayı 12-dən 14-ə çatdı. Maşınların boşaldılmasını gözləmə vaxtı 55 dəqiqədən 35 dəqiqəyə endi.
Avqustun 3-də terminalın şimal tərəfində 13 və 14 nömrəli yükləmə qapıları işə düşdü. İndi 14 qapımız var: 10-u yarımqoşqular, 4-ü furqonlar üçün. Yeni qapıların hər ikisi yarımqoşqu üçündür: hidravlik körpüsü və hermetik manjeti var, yağışda yük islanmır.
İlk üç həftənin nəticəsi
- Maşının boş qapını gözləmə vaxtı orta hesabla 55 dəqiqədən 35 dəqiqəyə endi.
- Axşam 17:00–20:00 arası, filial maşınları yüklənəndə, eyni vaxtda 8 əvəzinə 10 yarımqoşqu dayanır.
- Filial maşınlarının hamısı 20:30-dək yola düşür; əvvəl sonuncusu 21:15-də çıxırdı.
Maşınla gələnlər üçün
Terminal yük maşınlarını bazar ertəsindən şənbəyədək 08:00–22:00 arası, əvvəlcədən ayrılmış vaxtla qəbul edir. Bütöv yarımqoşqu üçün 45 dəqiqə ayrılır. Vaxtı bir gün əvvəl dispetçerlə razılaşdırın: qapının nömrəsi sürücüyə SMS-lə gəlir, girişdəki tərəzidən keçib birbaşa qapıya yanaşır.
