Beh verməzdən əvvəl hansı sənədləri yoxlayırıq

Bakıda mənzil alqı-satqısı adətən behlə başlayır: alıcı razılaşmanı təsdiqləmək üçün qiymətin bir hissəsini ödəyir, sonra notariusda müqavilə imzalanır. Beh müqaviləsi yazılı olmalıdır. Mülki Məcəlləyə görə, sövdələşmə behi verənin günahı ucbatından baş tutmasa, beh satıcıda qalır; behi alanın günahı ilə baş tutmasa, ikiqat qaytarılır. Ona görə sənədlər behdən əvvəl yoxlanılır.

Mülkiyyət və yüklər

• Daşınmaz Əmlakın Dövlət Reyestrindən çıxarış: satıcının adı pasportdakı ilə, sahə və ünvan isə mənzildəki ilə üst-üstə düşməlidir.
• Həbs və ipoteka: əmlak bankda girov və ya məhkəmə qərarı ilə həbsdə olmamalıdır. Təzə çıxarışı sövdələşmədən bir neçə gün əvvəl alırıq.
• Birgə mülkiyyət: mənzil nikah dövründə alınıbsa, həyat yoldaşının notarial razılığı lazımdır. Payı olan azyaşlı varsa, qəyyumluq orqanının icazəsi tələb olunur.
• Vəkalətnamə ilə satış: vəkalətnamənin notarial təsdiqli olduğunu, müddətinin bitmədiyini və geri götürülmədiyini notariusda yoxlayırıq; sahibi ilə video zəng edirik.

Qeydiyyat və borclar

• Mənzildə kimlərin yaşayış yeri üzrə qeydiyyatda olduğunu yoxlayırıq. Satıcı onları notariusa qədər qeydiyyatdan çıxarmalıdır; bu, müqavilədə yazılır.
• Qaz, işıq və su üzrə son qəbzləri istəyirik ki, borc yeni sahibə keçməsin.
• Planlaşdırma: çıxarışdakı plan ilə faktiki vəziyyət fərqlidirsə (sökülmüş divar, birləşdirilmiş eyvan), bunu alıcıya yazılı bildiririk; ipoteka bankı bunu qiymətləndirmədə görəcək.

Yeni tikilidə

Çıxarışı hələ verilməmiş yeni binada mənzili tikinti şirkəti ilə müqavilə əsasında alırsınız. Burada şirkətin tikinti icazəsini, binanın istismara qəbul vəziyyətini və çıxarışın nə vaxt veriləcəyini yoxlayırıq. Çıxarışsız mənzilə dövlət ipotekası verilmir.

Bizim elanlarımızda bu yoxlama pulsuzdur. Başqa yerdə tapdığınız mənzil üçün hüquqşünasımız eyni yoxlamanı 150 ₼-a aparır.